Чӑваш Республикин Пуҫлӑхӗ тӑван чӗлхене упрас ыйтӑва ҫӗклерӗ

Паян Ҫеҫпӗл Мишши ячӗллӗ Ҫамрӑксен театрӗнче Чӑваш Республикин Пуҫлӑхӗ Олег Николаев пултарулӑх интеллигенцийӗпе тӗл пулса чӑваш чӗлхине, наци культурипе искусствине упрас, малалла аталантарас ыйтӑва сӳтсе яврӗ.
Калаҫӑва вӗрентӳ, культура учрежденийӗсен, массӑллӑ информаци хатӗрӗсен, обществӑлла организацисен ертӳҫисем, чӗннӗ хӑнасем, республикӑри театрсенче ӗҫлекен ҫамрӑк артистсемпе артист пулма вӗренекен студентсем, пулас режиссёрсемпе ӳнерҫӗсем хутшӑнчӗҫ. Тӗлпулура Чӑваш Республикин Пуҫлӑхӗн Администрацийӗн ертӳҫи Вячеслав Борисов, Чӑваш Республикин Министрсен Кабинечӗн Председателӗн ҫумӗ – Чӑваш Республикин вӗрентӳ министрӗ Алла Леонидовна Салаева тата Чӑваш Республикин культура, национальноҫсен ӗҫӗсен тата архив ӗҫӗн министрӗ Светлана Анатольевна Каликова пулчӗҫ.
Ака уйӑхӗн 25-мӗшӗнче эпир кашни ҫулах Чӑваш чӗлхи кунне паллӑ тӑватпӑр. Кӑҫал вӑл чӑваш ҫырулӑхне туса хунӑранпа 150 ҫул ҫитнипе те ҫыхӑннӑ. Уява епле ирттересси ҫинчен калаҫнӑ май тӗлпулӑва хутшӑнакансем ҫӗнӗрен те ҫӗнӗ темӑсем ҫӗклерӗҫ: тӑван чӗлхепе мультфильмсем ӳкересси, ача-пӑча кӗнекисем пичетлесси, театрсем валли режиссёрсем хатӗрлесси, республикӑри аслӑ вӗренӳ заведенийӗсенче паянхи кун кирлӗ ҫӗнӗ специальноҫсене вӗрентесси, турист маршручӗсем уҫасси, чӑваш чӗлхине интернетра та аталантарасси ҫинчен калаҫрӗҫ.
Нумаях пулмасть Михаил Юхма Чӑваш халӑх писателӗ 85 ҫул тултарчӗ. Вӑл истори романӗсемпе повеҫсен, халап-калав, очерк, драматурги тата поэзи произведенийӗсен авторӗ. Унсӑр пуҫне чӑваш халӑхӗн историне, фольклорне, мифологине тӗпчекенӗ те шутланать. Ҫак тӗлпулура Чӑваш наци культурине аталантарассишӗн тунӑ пысӑк ӗҫсемшӗн республика ертӳҫи Михаил Николаевича хӑйӗн Тав ҫырӑвӗпе чысларӗ.
Тӗлпулу хыҫҫӑн Чӑваш Республикин Пуҫлӑхӗпе ытти хӑнасем Ҫамрӑксен театрӗн «Уйӑпсем те шӑнса хытрӗҫ» ятлӑ ҫӗнӗ спектакльне курчӗҫ. Куракансем умне вӑл пӗрремӗш хут ака уйӑхӗн 20-мӗшӗнче 18 сехет те 30 минутра тухӗ.