Паян Çеçпĕл Мишши ячĕллĕ Çамрăксен театрĕнче Чăваш Республикин Пуçлăхĕ Олег Николаев пултарулăх интеллигенцийĕпе тĕл пулса чăваш чĕлхине, наци культурипе искусствине упрас, малалла аталантарас ыйтăва сӳтсе яврĕ.
Калаçăва вĕрентӳ, культура учрежденийĕсен, массăллă информаци хатĕрĕсен, обществăлла организацисен ертӳçисем, чĕннĕ хăнасем, республикăри театрсенче ĕçлекен çамрăк артистсемпе артист пулма вĕренекен студентсем, пулас режиссёрсемпе ӳнерçĕсем хутшăнчĕç. Тĕлпулура Чăваш Республикин Пуçлăхĕн Администрацийĕн ертӳçи Вячеслав Борисов, Чăваш Республикин Министрсен Кабинечĕн Председателĕн çумĕ – Чăваш Республикин вĕрентӳ министрĕ Алла Леонидовна Салаева тата Чăваш Республикин культура, национальноçсен ĕçĕсен тата архив ĕçĕн министрĕ Светлана Анатольевна Каликова пулчĕç.
Ака уйăхĕн 25-мĕшĕнче эпир кашни çулах Чăваш чĕлхи кунне паллă тăватпăр. Кăçал вăл чăваш çырулăхне туса хунăранпа 150 çул çитнипе те çыхăннă. Уява епле ирттересси çинчен калаçнă май тĕлпулăва хутшăнакансем çĕнĕрен те çĕнĕ темăсем çĕклерĕç: тăван чĕлхепе мультфильмсем ÿкересси, ача-пăча кĕнекисем пичетлесси, театрсем валли режиссёрсем хатĕрлесси, республикăри аслă вĕренÿ заведенийĕсенче паянхи кун кирлĕ çĕнĕ специальноçсене вĕрентесси, турист маршручĕсем уçасси, чăваш чĕлхине интернетра та аталантарасси çинчен калаçрĕç.
Нумаях пулмасть Михаил Юхма Чăваш халăх писателĕ 85 çул тултарчĕ. Вăл истори романĕсемпе повеçсен, халап-калав, очерк, драматурги тата поэзи произведенийĕсен авторĕ. Унсăр пуçне чăваш халăхĕн историне, фольклорне, мифологине тĕпчекенĕ те шутланать. Çак тĕлпулура Чăваш наци культурине аталантарассишĕн тунă пысăк ĕçсемшĕн республика ертÿçи Михаил Николаевича хăйĕн Тав çырăвĕпе чысларĕ.
Тĕлпулу хыççăн Чăваш Республикин Пуçлăхĕпе ытти хăнасем Çамрăксен театрĕн «Уйăпсем те шăнса хытрĕç» ятлă çĕнĕ спектакльне курчĕç. Куракансем умне вăл пĕрремĕш хут ака уйăхĕн 20-мĕшĕнче 18 сехет те 30 минутра тухĕ.
